Hlutverk
Vefritið Hugrás er gátt almennings inn í heim Hugvísindasviðs Háskóla Íslands og fræðimanna sviðsins út í samfélagið. Hugrás er umræðuvettvangur sérfræðinga, kennara og nemenda um allt er varðar húmanísk fræði, menningu og samfélagsumræðu.
Hugvísindasvið leggur áherslu á að eiga í samræðu við samfélagið utan háskólans og miðla þekkingu sem víðast.
Á Hugvísindasviði starfa tugir sérfræðinga, kennara og doktorsnema á sviði tungumála, íslensku, sagnfræði, guðfræði, heimspeki, fornleifafræði, trúarbragðafræði, málvísinda og bókmennta.
Um heiti vefritsins
Í Hugrás felst tilvísun í íslenska menningarsögu, enda ber þekkt lærdómsrit frá 17. öld þetta heiti, þ.e. Hugrás eftir séra Guðmund Einarsson á Staðarstað, ritað 1627. Nafnið er þjált í munni og má líka skilja sem tilvísun í rafræna útgáfu, því að orðið rás er notað í því samhengi, auk þess sem það má skilja sem farveg fyrir hug(sanir) fólks á Hugvísindasviði.
Ritnefnd
Fulltrúar úr öllum deildum Hugvísindasviðs sitja í ritnefnd Hugrásar auk tveggja doktorsnema.
- Guðrún Björk Guðsteinsdóttir, prófessor í ensku
- Róbert H. Haraldsson, prófessor í heimspeki
- Gauti Kristmannsson, dósent í þýðingafræði
- Gunnlaugur A. Jónsson, prófessor í guðfræði
- Þröstur Helgason, doktorsnemi
- Íris Ellenberger, doktorsnemi
- Guðmundur Hörður Guðmundsson, kynningar- og vefstjóri
Dagleg ritstjórn er í höndum kynningar- og vefstjóra og MA-nema í hagnýtri ritstjórn og útgáfu.
Kolbrún Þóra Eiríksdóttir er fulltrúi MA-nema frá september 2011.
Af hverju er myndlist/sjónlist og dans ekki undir menningar linkinum hjá ykkur? Þið gerið ykkur sek um að hunsa þessar tvær listgreinar eins og hefur tíðkast hjá mörgum miðlum þrátt fyrir áhuga meðal fólks! Listamenn á við Ragnar Kjartans (sjónlist) og Erla Ómars (dans) hafa vakið mikla athygli og eru ómetanleg í menningaflóruna. Þau eru nefnd hér en listamannalistinn er ótæmandi. Mögulega er ykkur ekki ljóst hversu rík af sköpun og grósku þessar tvær listgreinar eru, en þá er það hér með leiðrétt og ábending komin til skila.
kv.
Sara Riel
Þetta er meðal annars í stefnuskránni ykkar:
Vefritið er hugsað sem vettvangur fyrir vandaða menningarumfjöllun. Það vantar miðla sem fjalla um menningu, listir og bækur sem eru skrifaðar af fólki sem er vel að sér á viðkomandi sviðum og Hugrás er m.a. ætlað að fylla það skarð.